CONTOH MC BERBAHASA BALI

Inggih suksema aturang titiang majeng ring ide-dane makesami antuk galah sane sampun prasida kasukserahan majeng ring titiang. Titiang mapesengan Wina Pangenter Baos panyeligihi saking Seka Truna Truni Manik Asta Gina Desa Sangket Kecamatan Sukasada.

Parikrama nyagra wanti warsa Seka Truna Truni Manik Asta Gina Desa

Sangket Kecamatan Sukasada kaping 54 ring rahina Redite wage, tanggal masehi 15 April 2012 jagi kakawitin.

Om Swastyastu,

        Dane Bapak Camat Sukasada sane murdayang titiang

        Dane Bapak Kepala Desa sane kusumayang titiang

        Dane Jero Bendesa Adat miwah Kelian Adat lan Dinas sane wangiang titiang

        Para Manggala miwah Krama Seka Truna Truni sinamian sane tresna sihin titiang

Pinih ajeng lugrayang rihin titiang ngaturang rasa angayubagia majeng ring Ida Sang Hyang Widhi Wasa, duaning sangkaning asung kerta wara nugrahan Ida mawinan titiang pingkalih Ida-dane sinamian mangguh karahajengan saha prasida rauh ring wengine puniki. Nenten lali titiang ngaturan rahajeng wegi saha matur suksma majeng ring keledangan Ida-dane ngrauhin Parikramane puniki. Tatujon parikrama puniki nenten lian wantah anggen ngukuhang rasa gotong-royong rikalane maorganisasi, utamannya para yowanane utawi para truna-trunine sami. Inggih pinaka panyembrama, pacang kaunggahang sasolahan “Sekar Jagat”. Majeng ring para pragina miwah panabuh durusang titiang!

……………………..Sasolahan Sekar Jagat……………………….

Para atiti miwah uleman sinamian sane suksemayang titiang,
santukan pamungkah acarane sampun kamargiang titiang, mangkin nglantur ring acara “Nembangang Lagu Indonesia Raya”. Antuk punika titiang nunas mangda Ida-dane ngadeg rihin ajebos! Sang sane ngenterang lagu rarisang titiang!

……………………..Lagu Indonesia Raya……………………….

Ida-dane, sane mangkin pacang kalanturang antuk parikrama ngeningang Citta utawi Mengheningkan Cipta. Antuk punika, tunas titiang kaledangan Bapak Camat ngenterang acarane puniki! Majeng ring Bapak Camat durusang titiang!

……………………..Ngeningan Citta ……………………….

Bapak Camat miwah ida-dane sinamian sane wangiang titiang,
Sane mangkin kalanturang antuk parikrama kaping tiga sane marupa atur piuning saking manggala karya. Dane Pamucuk Karya inggih punika Kelian Seka Truna Truni Manik Asta Gina durusang Titiang!

……………………..Atur Piuning Manggala Karya ……………………….

Para atiti miwah uleman sane kusumayang titiang,

Acara selanturnyane marupa Sambrama Wecana saking Bapak Kades Desa

Sangket. Antuk punika Bapak kades durusang titiang.

…………………….. Sambrama Wecana Bapak Kades ………………………

Matur suksma aturang titiang majeng ring Bapak Kades, sane mangkin Ida-dane pacang iring Tititang mirengang Dharma Wacana saking Bapak Camat Sukasada. Majeng ring Bapak Camat durusang Titiang!

…………………….. Dharma Wecana Bapak Camat ………………………

Ida-dane para atiti miwah uleman sane kusumayang titiang,

Sampun suwe Ida-dane iring titiang nyarengin parikramane iwawu, mangkin sampun panemaya titiang jagi ngiring Ida-dane miarsayang parikrama kaping untat marupa panglila cita utawi balih-balihan.

•   Kapertama pacang kaaturang sasolahan “Tari Jauk Manis” saking krama seka truna druene. Majeng Pragina lan Panabuh durusang titiang!

• Kaping kalih ngiring piarsayang sasolahan sane mawasta “Tari Cendrawasih” sane taler kasolahang antuk para karma seka turni druene. Para pragina miwah penabuh rarisan titiang!

• Nglantur mangkin ring panglila cita kaping ungkur marupa sasolahan Arja Lanang saking “Seka Arja Akah Canging”. Majeng ring Pragina lan panabuh durusang titiang!

Bapak Camat miwah Ida-dane sinamian. Rauh iriki titiang prasida ngenterang acarane puniki. Maka kirang langkung atur Titiang, lugrayang Titiang nglungsur geng rena pangampura. Pinaka panguntat atur titiang, titiang puputang antuk parama santhi.

Om Santhi, Santhi, Santhi, Om.